Tirana – tri jetët e një qyteti

Është e vështirë të mendosh që emri i qytetit antik ilir – Albanopolis – qëndron ”rastësisht” në rrënjë të emrit të sotëm të një populli (Albania), emër me të cilin ai identifikohet sot nga e gjithë bota. Por, po aq e vështirë është të mendosh edhe që qyteti ilir në Zgërdhesh( në këmbë të malit të Krujës), aq pranë Tiranës së sotme, të mos qëndroj në themelin urban e historik të kryeqytetit të sotëm të shqiptarëve. Emrat Albanopolis dhe Albanon përfaqësojnë në thelb termat e pandryshuar, me të cilat të huajt kanë thirrur vendasit dhe qytetin e tyre; emrat Zgërdhesh dhe Krujë janë krejt të ndryshëm, madje ato mishërojnë përkatësisht: i pari emrin e një fisi ( Skurrajt), ndërsa i dyti një veçori natyrore të vendit (krojet). Pra, në këtë rast ka një dallim nga këndvështrimi i emërtimit që të huajt dhe vendasit i kanë bërë këtyre qyteteve.