133 Iluministë të sportit shqiptar

“133 iluministë të sportit shqiptar” janë 133 personalitete të shquar të sportit shqiptar, që me talentin, punën e jashtëzakonshme dhe përshfaqjet e shkëlqyera i dhanë dritësim e madhështi sportit, i dhanë gëzim të papërshkrueshme sportdashësve shqiptarë. Një histori sportive shumëplanëshe individësh që përfaqësojnë futbollin, basketbollin, volejbollin, atletikën, peshëngritjen, boksin, kikboksin, mundjen, çiklizmin, notin, vaterpolin, qitjen, hendbollin, shahun, pingpongun, karatenë e bejsbollin etj. Këta dinjitarë të shpërndarë anekënd Shqipërisë, Kosovës, Maqedonisë etj., kanë qenë e janë njerëz të thjeshtë e të kulturuar që kanë bërë e shkruar histori, janë sportistë të mëdhenj, trajnerë kombëtarë, trajner të huaj italianë e kroatë, profesorë të titulluar, drejtues sporti kompetentë, drejtorë sportivë klubesh të nivelit evropian, gjyqtarë ndërkombëtarë, gazetarë, themelues sportesh për herë të parë, shkollash sportive e gazetash kombëtare, komentatorë e erudit shumëdisiplinarë, studiues e botues librash, projektues e zbatues të shkëlqyer të ndërtimit të terreneve sportive të Shqipërisë në kohën e izolimit total 45-vjeçar, mjekë sportivë të kulturuar, mësonjës disiplinash sportive etj.